Lost your phone? You can get it back with just one message sitting at home!
మీ ఫోన్ పోయిందా? ఇంట్లో కూర్చొనే ఒక్క మెసేజ్ తో తిరిగి పొందొచ్చు!
మొబైల్ ఫోన్.. దీన్ని కనిపెట్టిన వాడు ఎవడో గానీ నిజంగా దండేసి దండం పెట్టాలి. లేకపోతే ఏంటి… ప్రస్తుతం ఇది లేకపోతే ఒక్కపని కూడా జరగదు.
ఉదయం నిద్రలేచిన రాత్రి నిద్రపోయే వరకు ప్రతి పనిలోనూ మొబైల్ అవసరం కచ్చితంగా ఉంటుంది. ఇంకా చెప్పాలంటే మన శరీరంలో చేయి, కాలు ఎలానో.. మొబైల్ కూడా అలా ఓ భాగమైపోయింది. మరి అలాంటి మొబైల్ పోతే, తిరిగి దక్కించుకోవడం చాలా కష్టం. పోలీసుల దగ్గరకు వెళ్లాలి, ఫిర్యాదు చేయాలి. ఇవన్నీ కాదనుకుంటే టెక్నికల్ గా అయినా ప్రయత్నించాలి. ఇన్ని చేసినా సరే పోయిన సెల్ ఫోన్ దొరుకుతుందనే గ్యారంటీ లేదు. అయితే పోగొట్టుకున్న ఫోన్ సింపుల్ గా రికవరీ చేసిపెడతామని పోలీసులు చెబుతున్నారు.
ఇక వివరాల్లోకి వెళ్తే.. పోగొట్టుకున్న సెల్ ఫోన్ వెతికిపెట్టేందుకు అనంతపురం పోలీసులు “చాట్ బాట్” పేరుతో డిఫరెంట్ సేవల్ని అందుబాటులోకి తీసుకొచ్చారు. దీనికోసం పోలీస్ స్టేషన్ కు వెళ్లాల్సిన అవసరం, ఎఫ్ఐఆర్ ఫైల్ చేయాల్సిన అవసరం లేదని చెప్పారు. జస్ట్ వాట్సాప్ లో మెసేజ్ చేస్తే చాలని.. పోగొట్టుకున్న ఫోన్ ని రికవరీ చేసి, బాధితులకు అందజేస్తామని అనంతపురం ఎస్పీ ఫక్కీరప్ప చెప్పారు. ఈ ‘చాట్ బాట్’ టెక్నాలజీని కొన్ని నెలల క్రితమే అందుబాటులోకి తీసుకొచ్చారు. దీని కోసం ఏమేం చేయాలో కూడా వివరంగా చెప్పుకొచ్చారు.
‘చాట్ బాట్’ పనిచేసే విధానం:
సెల్ ఫోన్ పోగొట్టుకున్నా లేదా చోరీకి గురైనా సరే ముందుగా 9440796812 నంబర్ కి హాయ్ లేదా హెల్ప్ అని మెసేజ్ చేయండి.
‘వెల్ కమ్ టూ అనంతపురం పోలీస్’ పేరుతో వచ్చే లింక్ ఓపెన్ చేయండి. అందులో మీ వివరాలతో పాటు ఫోన్ మోడల్, IMEI నంబర్, మిస్సయిన ప్లేస్ డీటైల్స్ కూడా ఫిల్ చేయండి.
డీటైల్స్ నమోదు చేయగానే కంప్లైంట్ వెళ్తుంది. 8 మందితో కూడిన ప్రత్యేక సాంకేతిక బృందం దీన్ని పర్యవేక్షిస్తుంది.
చాట్ బాట్ ద్వారా ఫోన్లు ఆచూకీ లభిస్తుండటంతో.. తెలుగు రాష్ట్రాలతో పాటు కర్ణాటక, తమిళనాడు, కేరళ నుంచి కూడా ఫిర్యాదులు వస్తున్నాయి.
ఈ ఏడాది ఆగస్టు చివరివరకు 10 వేలకు పైగా కంప్లైంట్స్ రాగా, దాదాపు 2000 వేలకు పైగా ఫోన్ల ఆచూకీ కనుగొని బాధితులకు అందజేశారు. 3 వేల ఫోన్ల వివరాలు తెలిశాయి.
0 Comments:
Post a Comment