PAN Card: పాన్ కార్డ్ హోల్డర్లకు అలర్ట్... ఈ తప్పు చేస్తే రూ.10,000 ఫైన్ తప్పదు

1. మీకు పాన్ కార్డుకు సంబంధించిన నియమనిబంధనలన్నీ తెలుసా? ఆదాయపు పన్ను చట్టంలో (Income Tax Act) కొన్ని సెక్షన్స్‌లో పాన్ కార్డుకు సంబంధించిన నియమనిబంధనలున్నాయి. వాటిని ఉల్లంఘిస్తే పాన్ కార్డ్ హోల్డర్లు భారీ జరిమానా చెల్లించాల్సి వస్తుంది. 

2. పాన్ కార్డ్ హోల్డర్లు తప్పనిసరిగా తమ పాన్ నెంబర్, ఆధార్ నెంబర్ లింక్ చేయాలని ఆదాయపు పన్ను శాఖ పదేపదే కోరుతోంది. అనేకసార్లు డెడ్‌లైన్ కూడా పొడిగించింది. చివరిసారిగా 2021 సెప్టెంబర్ 30 నుంచి 2022 మార్చి 31 వరకు డెడ్‌లైన్ పొడిగించిన సంగతి తెలిసిందే. అంటే పాన్ కార్డ్, ఆధార్ నెంబర్ లింక్ చేయడానికి ఈ నెల మాత్రమే గడువు ఉంది.

3. గడువు అప్పట్లోగా పాన్ కార్డ్ హోల్డర్లు తప్పనిసరిగా ఆధార్ నెంబర్ లింక్ చేయాల్సిందే. పాన్ కార్డ్ హోల్డర్లు తమ ఆధార్ నెంబర్ లింక్ చేయకపోతే ఆదాయపు పన్ను చట్టం, 1961 లోని సెక్షన్ 234H ప్రకారం రూ.1,000 జరిమానా చెల్లించాల్సి ఉంటుంది. ఒకవేళ చెల్లని పాన్ కార్డ్ ఉపయోగించినట్టైతే రూ.10,000 జరిమానా చెల్లించాలి

4. ఆధార్ లింక్ చేయని పాన్ కార్డుల్ని 2022 మార్చి 31 వరకు ఉపయోగించుకోవచ్చు. ఆ తర్వాత ఆ పాన్ కార్డ్ చెల్లదు. చెల్లని పాన్ కార్డుల్ని ఆర్థిక లావాదేవీలకు ఉపయోగించడం చట్ట విరుద్ధం. కాబట్టి జరిమానా చెల్లించాల్సి ఉంటుంది. గడువు తర్వాత పాన్, ఆధార్ లింక్ చేసినా జరిమానా చెల్లించాలి.

5. ఇప్పటికే ఆదాయపు పన్ను శాఖ అనేకసార్లు గడువు పొడిగించింది. మరోసారి గడువు పొడిగిస్తుందా లేదా అన్న స్పష్టత లేదు. కాబట్టి పాన్ కార్డ్ హోల్డర్లు మార్చి 31 లోగా తమ ఆధార్ నెంబర్ లింక్ చేయాలి. పాన్, ఆధార్ నెంబర్లు లింక్ చేయడానికి పాన్ కార్డ్ హోల్డర్లు ముందుగా ఆదాయపు పన్ను శాఖ వెబ్‌సైట్ https://www.incometax.gov.in/ ఓపెన్ చేయాలి. 

6. హోమ్ పేజీలోనే Link Aadhaar లింక్ పైన క్లిక్ చేయాలి. మొదట పాన్ నెంబర్ ఎంటర్ చేయాలి. రెండో కాలమ్‌లో ఆధార్ నెంబర్ ఎంటర్ చేయాలి. ఆ తర్వాత ఆధార్ కార్డులో ఉన్నట్టుగా పేరు టైప్ చేయాలి. తర్వాత మొబైల్ నెంబర్ ఎంటర్ చేయాలి. ఒకవేళ మీ ఆధార్ కార్డుపై పుట్టిన సంవత్సరం మాత్రమే ఉంటే I have only year of birth in Aadhaar card సెలెక్ట్ చేయాలి.

7. ఆ తర్వాత I agree to validate my Aadhaar details సెలెక్ట్ చేయాలి. తర్వాత Link Aadhaar క్లిక్ చేస్తే మీ మొబైల్ నెంబర్‌కు ఓటీపీ వస్తుంది. ఓటీపీ ఎంటర్ చేసి Validate పైన క్లిక్ చేయాలి. మీ పాన్ కార్డ్, ఆధార్ నెంబర్ లింక్ అవుతుంది. ఒకవేళ మీ పాన్, ఆధార్ నెంబర్ ముందే లింక్ అయితే Your PAN is already linked to given Aadhaar అనే మెసేజ్ కనిపిస్తుంది

8. ఎస్ఎంఎస్ ద్వారా పాన్, ఆధార్ లింక్ చేయడానికి మీ రిజిస్టర్డ్ మొబైల్ నెంబర్ ఉన్న ఫోన్‌లో ఎస్ఎంఎస్ యాప్ ఓపెన్ చేయండి. New Message ఓపెన్ చేసి UIDPAN అని టైప్ చేసి స్పేస్ ఇవ్వండి. మీ 12 అంకెల ఆధార్ నెంబర్ టైప్ చేసి స్పేస్ ఇచ్చి 10 డిజిట్ పాన్ నెంబర్ ఎంటర్ చేయండి. ఈ మెసేజ్‌ను 567678 లేదా 56161 నెంబర్‌కు ఎస్ఎంఎస్ పంపండి. మీ పాన్ నెంబర్, ఆధార్ నెంబర్ లింక్ అవుతుంది.