మాస్కో: ప్రపంచాన్ని భయపెడుతున్న కరోనా వైరస్‌ను ఎదుర్కొనేందుకు బ్రహ్మాస్త్రమైన వ్యాక్సిన్‌ కోసం జనమంతా కోటి ఆశలతో ఎదురుచూస్తున్న వేళ రష్యా తొలి టీకాను ప్రకటించిన విషయం తెలిసిందే. తన కుమార్తె సహా పలువురు టీకా వేయించుకున్నట్టు ఆ దేశ అధ్యక్షుడు పుతిన్‌ వెల్లడించారు. ఈ వ్యాక్సిన్‌కు స్పుత్నిక్-వి అని నామకరణం చేశారు. రష్యా అభివృద్ధి చేసిన ఈ వ్యాక్సిన్‌ కోసం పలు దేశాలు క్యూ కడుతున్నాయి. ఇప్పటివరకు దాదాపు బిలియన్‌ డోస్‌ల వ్యాక్సిన్‌ కోసం 20 దేశాలు ముందస్తుగా ఆర్డర్‌ చేశాయని ఈ వ్యాక్సిన్‌కు నిధులు సమకూరుస్తున్న రష్యన్‌ డైరెక్ట్‌ ఇన్వెస్ట్‌మెంట్‌ ఫండ్‌ సంస్థ అధిపతి కిరిల్‌ దిమిత్రియేవ్‌ తెలిపారు.
ఈ వ్యాక్సిన్‌ మూడో దశ ట్రయల్స్‌ బుధవారం నుంచి ప్రారంభమవుతాయన్నారు. అలాగే, పరిశ్రమల్లో వ్యాక్సిన్‌ ఉత్పత్తిని మాత్రం సెప్టెంబర్‌ నుంచి ప్రారంభించే అవకాశం ఉన్నట్టు పేర్కొన్నారు. ది గమలేయా రీసెర్చి ఇన్‌స్టిట్యూట్‌ అభివృద్ధి చేస్తున్న స్పుత్నిక్-వి వ్యాక్సిన్‌పై విదేశాలు ఆసక్తి చూపుతున్నట్టు గుర్తించామని తెలిపారు. ఈ వ్యాక్సిన్‌ పొందేందుకు ఇప్పటికే 20 దేశాల నుంచి దరఖాస్తులు వచ్చాయని వెల్లడించారు. విదేశీ భాగస్వాములతో కలిసి రష్యా ఏడాదికి 500 మిలియన్‌ డోసుల వ్యాక్సిన్‌ను ఐదు దేశాల్లో ఉత్పత్తి చేస్తుందని ఆయన తెలిపారు.
0 comments:
Post a comment